HALUAN DEMOKRASI.COM
“Pincuih? Apo tu Tek Nun? Dima urang manjua?” tanyo si Kambuik. Adiak bujang Tek Nun.
Nan tabayang dek Kambuik ko makanan khas urang awak. Godok batinta, ondeh-ondeh baatua, lapek sagan, kacimuih, dll.
“Dima pulo urang ka manjua. Ndak dijua urang dooo, Yuang,” jawek Tek Nun.
“Eh, jan lah mamburansang kali. Kalau ndak babali tu dima Tek Nun dapek? Baciluik yo?”
“Amaaaaaakkkkk,” sorak Tek Nun jo suaro cemprengnyo.
Mandanga suaro Tek Nun nan mode belek kosong digua tajago sagalo nan lalok.
“Oiiii, kalau ka konser agak manjauah baa nyo. Ndak tantu aden sadang bamimpi bagai,” kecek kuciang jantan sambie mambulalang.
“Ma tau Aden. Aden sadang paniang.”
“Paniang, paniang surang se lah. Jan bao bao pulo nan lain.”
“Perasaan dari tadi Aden ndak ado bao sia-sia do. Situ se nan maraso dibaonyo.”
“Maraso dibao indak. Tapi mamakak talingo.
Suasana samakin angek. Dak sorang juo nan amuah mangalah. Jan kan ka mangalah podo se ndak amuah.
“Aciiiiin,” tadanga bunyi basin dari lua.
“Ko ciek lai. Lah jaleh bavirus manjala-jala juo lai,” kecek si Rogi sambie baturo-turo.
Ruponyo Mak Nalo. Mamak pusako Tek Nun nan baru sajo pulang manyabik rumpuik. Di tangannyo masih tapacik sabik jo batu pangilia.
“Apo juo nan bapacakak an lai? Ko sabik lai masih tajam juo lai ko a,” kecek Mak Nalo sambie mambukak topi di kapalonyo.
Mandangaan Mak Nalo manyabuik sabik tajam, si Rogi, binatang pangantuak tu langsuang malompek ka lua. Bagageh manyalamek an diri sabalun jadi korban.
“Kopi satangah Nun, kariang pulo rangkauangan rasonyo,” kecek Mak Nalo.
“Sabanta, Mak.”
“Apo nan bapacakak an, Mbuik?” tanyo Mak Nalo ka si Kambuik.
“Antahlah, Mak. Induak-induak lah ka namonyo. Ciek dek awak tujuah baleh dek inyo.”
“Inyo nan mulai dulu, Mak. Dikecek an nyo awak panciluik.” Sorak Tek Nun dari dapua.
“Bukan itu maksudnyo, Tek Nun. Bueklah kopi satangah lu, bia wak cancang nak nyo lunak,” kecek Kambuik sambie duduak dakek Mak Nalo.
“Waang mantun pulo, samo lo jo induak-induak.” Mak Nalo langsuang malapie Kambuik.
Tek Nun mambao kopi duo galeh dari dapua. Baru sajo kopi talatak langsuang dinonoh dek Mak Nalo. Ndak manunggu dingin bagai do. Sudah tu manyalai rokok sabatang di jarinyo.
“Iko ulah pincuih tadi ko, Mak. Ditanyo dima dibali, antah apo-apo se jawek Tek Nun ko.” Kambuik mulai mambukak carito.
“Apo nan pincuih?”
“Itu, Mak. Galon aie,” jawek Tek Nun.
Ha Ha Ha …!
Mandanga nan mode tu kalua galak gadang Mak Nalo.
Kambuik, Kambuik. Dima pulo urang ka manjua pincuih. Mako e, palajari bahaso awak. Pincuih tu samo jo lesuik. 11 12 jo badan waang. Makoe, jan bahaso inggirih sajo nan dipalajari. Bahaso awak paralu juo.
Pagi hari mamakan lamang
Sanjo nyo mambali salak
Jikok pandai bahaso urang
Palajari juo bahaso awak
(By: Tek Nun)
